धाराशिव : ज्येष्ठ नेते संजय निंबाळकर तसेच भाजपचे दिग्गज नेते रामेश्वर शेटे यांचा आज उद्धव बाळासाहेब ठाकरे पक्षात प्रवेश होणार आहे. या प्रवेशासाठी शेकडो कार्यकर्ते मातोश्रीकडे रवाना झाले असल्याची माहिती तानाजी जाधवर यांनी दिली.रामेश्वर शेटे हे भाजपमधील सक्रिय आणि दिग्गज नेते म्हणून ओळखले जातात.
जिल्ह्यात त्यांचा चांगला जनसंपर्क आणि राजकीय प्रभाव आहे. ते वकील आघाडीचे जिल्हा संयोजक, खरेदी-विक्री संघाचे उपाध्यक्ष तसेच विधी विभाग, धाराशिव जिल्हा या जबाबदाऱ्या सांभाळत आहेत. त्यांच्या पक्षप्रवेशामुळे उबाठा पक्षाच्या संघटनेला मोठी ताकद मिळणार आहे.संजय निंबाळकर हे देखील सक्रिय राजकारणात असून, जिल्ह्यातील राजकीय आणि सामाजिक क्षेत्रात त्यांचा सक्रिय सहभाग राहिला आहे. त्यांच्या प्रवेशामुळे पक्षाच्या संघटनात्मक ताकदीत आणखी भर पडणार आहे.
दरम्यान, खासदार ओमराजे निंबाळकर यांनी उबाठाची साथ सोडून शिंदे सेनेत प्रवेश केल्यानंतर धाराशिव जिल्ह्यात उबाठा पक्षाला मोठा राजकीय धक्का बसला होता. त्यानंतर मोठ्या प्रमाणात पक्षफूट झाली आणि अनेक पदाधिकारी व कार्यकर्त्यांनी पक्ष सोडल्याने संघटनेसमोर मोठे आव्हान उभे राहिले होते.मात्र, या कठीण काळात आमदार कैलास पाटील यांनी पक्षाची ताकद टिकवून ठेवण्याची आणि संघटना पुन्हा उभी करण्याची जबाबदारी प्रभावीपणे स्वीकारली आहे. पक्षातील कार्यकर्त्यांशी सातत्याने संपर्क ठेवत, नव्या नेतृत्वाला पक्षाशी जोडत आणि जुन्या कार्यकर्त्यांना पुन्हा सक्रिय करत कैलास पाटील यांनी उबाठाची संघटनात्मक बांधणी मजबूत करण्यावर भर दिला आहे.
एकीकडे पक्षाला मोठ्या राजकीय धक्क्यांचा सामना करावा लागला असताना कैलास पाटील यांनी पक्षाची उरलेली ताकद वाचवण्यासोबतच ती वाढवण्याचे काम सुरू ठेवले आहे. त्याचाच परिणाम म्हणून आता जिल्ह्यातील प्रभावशाली आणि सक्रिय नेते पुन्हा उबाठाच्या गोटात येताना दिसत आहेत.संजय निंबाळकर आणि रामेश्वर शेटे यांचा आजचा प्रवेश हा कैलास पाटील यांच्या संघटनात्मक प्रयत्नांना मिळालेला महत्त्वाचा राजकीय प्रतिसाद मानला जात आहे.
आगामी काळात आणखी काही दिग्गज नेते आणि कार्यकर्ते उबाठामध्ये प्रवेश करणार असल्याची चर्चा असल्याने धाराशिवच्या राजकारणात कैलास पाटील यांच्या नेतृत्वाची आणि पक्षबांधणीच्या प्रयत्नांची चर्चा रंगली आहे.
