हॅलो धाराशिव – फलटण उपजिल्हा रुग्णालयातील महिला डॉक्टर डॉ. संपदा ताई मुंडे यांनी पोलिस अधिकाऱ्याच्या मानसिक छळाला कंटाळून आत्महत्या केल्याची घटना राज्यभरात खळबळ उडवणारी ठरली आहे. या प्रकरणावर खासदार ओमराजे निंबाळकर यांनी भूमिका देखील आपली भूमिका व्यक्त केली आहे. खासदार ओमराजे निंबाळकर यांनी आपल्या फेसबुकवर भावनिक पोस्ट करत राज्यातील कायदा-सुव्यवस्थेवर प्रश्नचिन्ह उपस्थित केले आहे.
ओमराजे निंबाळकर यांनी फेसबुक पोस्टमध्ये नेमकं काय म्हणाले?
निंबाळकर यांनी आपल्या पोस्टमध्ये म्हटलं आहे की —
“पोलीस अधिकाऱ्याचा मानसिक छळ सहन न झाल्याने डॉ. संपदा ताई मुंडे यांनी आत्महत्या केल्याची घटना अत्यंत धक्कादायक आहे. पोस्टमॉर्टेम रिपोर्ट बदलण्यासाठी दबाव आणला जात असल्याचं समोर आलं असून, हे राज्यातील कायदा-सुव्यवस्थेवर प्रश्नचिन्ह उभं करतं. पोलिसच अन्याय करू लागले तर महिलांनी न्याय मागायचं कुठं? या प्रकरणाची सखोल चौकशी होऊन संबंधितांवर कठोर कारवाई झाली पाहिजे. डॉ. संपदा ताई मुंडे यांना भावपूर्ण श्रद्धांजली.”
या पोस्टनंतर सोशल मीडियावर संतापाची लाट उसळली असून, नेटिझन्सनीही या घटनेवर कठोर शब्दांत प्रतिक्रिया व्यक्त केल्या आहेत. डॉ. मुंडे यांच्या आत्महत्येमागील सत्य बाहेर यावे आणि दोषींना शिक्षा व्हावी, अशी मागणी सर्व स्तरांतून होत आहे.
नेमके प्रकरण काय?
फलटण शहरातील उपजिल्हा रुग्णालयात कार्यरत असलेल्या महिला डॉक्टरने शहरातील एका हॉटेलमध्ये आत्महत्या केल्याने एकच खळबळ उडाली आहे. आत्महत्येपूर्वी डॉक्टरने आपल्या तळहातावर सुसाइड नोट लिहिल्याचे समोर आले असून, त्यात तिने दोन पोलिस अधिकाऱ्यांवर बलात्कार आणि मानसिक छळाचे गंभीर आरोप केले आहेत.
प्राथमिक माहितीनुसार, मृत महिला डॉक्टरने सुसाइड नोटमध्ये पोलिस उपनिरीक्षक बदने यांच्यावर वारंवार बलात्कार केल्याचा आणि पोलिस अधिकारी बनकर यांनी सलग चार महिने मानसिक छळ केल्याचा उल्लेख केला आहे. या धक्कादायक घटनेनंतर पोलिस प्रशासनात मोठी खळबळ उडाली आहे.
दरम्यान, महिलेच्या हातावर लिहिलेल्या सुसाइड नोटची फॉरेन्सिक तपासणी करण्यात येणार असल्याचे समजते. या घटनेनंतर नागरिकांमध्ये संतापाचे वातावरण निर्माण झाले असून, दोषींवर कठोर कारवाई करण्याची मागणी जोर धरत आहे.
