परंडा नगरपरिषदेत मोठ्या प्रमाणावर बोगस मतदार नोंदणी
बोगस मतदार यादीत उत्तर प्रदेशातून आलेल्या पाच मजुरांच्याही नावांची नोंद
या यादीत हिंदू, मुस्लिम, दलीत, माळी आणि ब्राह्मण या समाजातील लोकांचा समावेश
धाराशिव जिल्ह्यातील परंडा नगरपरिषदेत मोठ्या प्रमाणावर बोगस मतदार नोंदणी झाल्याचा गंभीर आरोप समोर आला आहे. एकाच घराच्या पत्त्यावर तब्बल ३७ मतदारांची नोंद झाल्याचे समोर आले असून, हे सर्व मतदार वेगवेगळ्या जाती-धर्माच्या असल्याने या प्रकारामुळे जिल्ह्यात मोठी खळबळ माजली आहे.
मिळालेल्या माहितीनुसार, या यादीत हिंदू, मुस्लिम, दलीत, माळी आणि ब्राह्मण या समाजातील लोकांचा समावेश आहे. इतकेच नव्हे तर उत्तर प्रदेशातून आलेल्या पाच मजुरांच्याही नावांची नोंद या यादीत करण्यात आल्याचा आरोप आहे.
या सर्व मतदारांची नोंद एकाच घराच्या पत्त्यावर करण्यात आली असून, हे घर शिवसेना (शिंदे गट) च्या माजी नगरसेवकाचं असल्याचं सांगितलं जात आहे. त्यामुळे या प्रकरणाला आता राजकीय रंग मिळू लागला आहे.
स्थानिक नागरिकांनी आणि विरोधी पक्षांनी या प्रकाराविरोधात तीव्र नाराजी व्यक्त केली असून, नगरपरिषद प्रशासनाकडे लेखी तक्रार दाखल करण्यात आली आहे. या तक्रारीत संबंधित बोगस मतदार नोंदींची सखोल चौकशी करून जबाबदारांवर कारवाई करण्याची मागणी करण्यात आली आहे.
दरम्यान, प्रशासनाकडून अद्याप कोणतेही अधिकृत स्पष्टीकरण देण्यात आलेले नाही. मात्र या प्रकरणामुळे नगरपरिषद निवडणुकीपूर्वी राजकीय वातावरण तापण्याची शक्यता वर्तवली जात आहे
