तेरखड्यात प्रचाराचा धडाका, युवकांचा लोंढा,विकी चव्हाणांमुळे शिवसेनेचा झेंडा पुन्हा फडकणारं?

तेरखडा (प्रतिनिधी) – आगामी जिल्हा परिषद निवडणुकीच्या पार्श्वभूमीवर शिवसेनेचे युवा नेतृत्व विकी चव्हाण यांच्या प्रचाराचा आज भव्य शुभारंभ झाला. या प्रचाराचा शुभारंभ तेरणा सहकारी साखर कारखान्याचे व्हाईस चेअरमन केशव सावंत यांच्या हस्ते करण्यात आला. या कार्यक्रमाला नागरिकांची मोठी गर्दी उसळली असून विशेषतः युवकांचा उत्स्फूर्त सहभाग लक्षवेधी ठरला आहे.

ढोल-ताशांच्या गजरात आणि शिवसेनेच्या घोषणांनी संपूर्ण परिसर दुमदुमून गेला होता. प्रचाराच्या पहिल्याच दिवशी झालेल्या या शक्तिप्रदर्शनामुळे तेरखडा तालुक्यातील राजकीय समीकरणे बदलत असल्याची चर्चा सुरू झाली आहे.

यावेळी बोलताना विकी चव्हाण यांनी तेरखड्याच्या सर्वांगीण विकासासाठी ठोस भूमिका मांडली. “तरुणांना रोजगार, शेतकऱ्यांना न्याय, आणि सामान्य नागरिकांना सक्षम प्रशासन देणे हेच माझे ध्येय आहे,” असे त्यांनी सांगितले. शिवसेनेच्या विचारधारेवर विश्वास ठेवून काम करण्याची ग्वाही त्यांनी दिली.

याप्रसंगी प्रमुख पाहुणे म्हणून उपस्थित असलेले तेरणा कारखान्याचे व्हा. चेअरमन केशव सावंत यांनी विकी चव्हाण यांच्या नेतृत्वावर विश्वास व्यक्त करत त्यांच्या पाठीशी शिवसेना ठामपणे उभी असल्याचे सांगितले. युवकांनी राजकारणात सक्रिय सहभाग घ्यावा, असे आवाहनही त्यांनी केले.

या शुभारंभप्रसंगी शिवसेनेच्या अनेक पदाधिकाऱ्यांसह स्थानिक कार्यकर्ते, महिला आणि नागरिक मोठ्या संख्येने उपस्थित होते. काही युवकांनी यावेळी शिवसेनेत जाहीर प्रवेश केल्याचेही पाहायला मिळाले.

एकूणच, विकी चव्हाण यांच्या प्रचाराला मिळालेला उत्स्फूर्त प्रतिसाद पाहता तेरखडा जिल्हा परिषद शिवसेनेकडे झुकणार का, याबाबत राजकीय वर्तुळात जोरदार चर्चा सुरू आहे. आगामी काळात प्रचार अधिक तीव्र होणार असल्याचे संकेत मिळत आहेत.