सांजा येथील शिवसेना उद्धव बाळासाहेब ठाकरे पक्षाचे सक्रिय, निष्ठावंत आणि जनसंपर्क असलेले कार्यकर्ते सिद्दीक तांबोळी यांची युवासेनेच्या जिल्हा सरचिटणीस पदी अधिकृत नियुक्ती करण्यात आली आहे. या नियुक्तीमुळे तालुका व जिल्हा पातळीवर शिवसेनेच्या युवासंघटनेला नवे बळ मिळाले आहे. ही नियुक्ती खासदार ओमराजे निंबाळकर, आमदार कैलास पाटील तसेच नंदुराजे निंबाळकर यांच्या प्रमुख उपस्थितीत पार पडली. पक्ष नेतृत्वाने तांबोळी यांच्या सामाजिक बांधिलकीची, युवकांमध्ये असलेल्या लोकप्रियतेची तसेच पक्षासाठी केलेल्या सातत्यपूर्ण कामगिरीची दखल घेत ही जबाबदारी सोपवली आहे. या प्रसंगी सांजा परिसरातील सर्व समाजातील नागरिक, युवक, शिवसैनिक व पदाधिकारी मोठ्या संख्येने उपस्थित होते. तांबोळी यांची निवड झाल्याने परिसरात उत्साहाचे वातावरण निर्माण झाले असून, युवकांमध्ये विशेष आनंदाचे वातावरण पाहायला मिळाले.
सिद्दीक तांबोळी यांनी यापूर्वी विविध सामाजिक उपक्रम, युवक प्रश्न, जनहिताचे आंदोलन तसेच पक्ष संघटन वाढीसाठी सक्रिय भूमिका बजावली आहे. त्यांच्या अनुभवाचा आणि कार्यक्षमतेचा लाभ युवासेनेच्या संघटनात्मक विस्तारासाठी होईल, असा विश्वास पक्ष नेत्यांनी व्यक्त केला आहे. या निवडीमुळे शिवसेना (उद्धव बाळासाहेब ठाकरे) पक्षात नवचैतन्य निर्माण झाले असून, आगामी काळात युवासेनेचे कार्य अधिक गतिमान व प्रभावी होईल, अशी आशा कार्यकर्त्यांमधून व्यक्त केली जात आहे.
