शासकीय कंत्राट मिळवण्यासाठी बनावट कागदपत्रे दिल्याचा प्रकार उघड
ठेकेदार रमेश कोकाटे (रा. निपाणी, ता. भूम) यांच्याविरुद्ध आनंदनगर पोलीस ठाण्यात गुन्हा दाखल
धाराशिव जिल्ह्यात ठेकेदार-गुंड संबंधांवरून चर्चेला उधाण
हॅलो धाराशिव : धाराशिव जिल्ह्यात खळबळ उडवणारी बातमी समोर आली आहे. गुंड निलेश घायवळ यांच्यासोबत सोशल मीडियावर व्हायरल झालेल्या ठेकेदारावर आता गंभीर गुन्हा दाखल करण्यात आला आहे. शासकीय कंत्राट मिळवण्यासाठी बनावट कागदपत्रे दिल्याचा प्रकार उघड झाल्यानंतर, माजी सरपंच आणि ठेकेदार रमेश कोकाटे (रा. निपाणी, ता. भूम) यांच्याविरुद्ध आनंदनगर पोलीस ठाण्यात गुन्हा दाखल करण्यात आला आहे.
कोकाटे यांनी बनावट कागदपत्रे सादर केल्याचे उघड
या प्रकरणी जिल्हा परिषद बांधकाम विभागाचे उपकार्यकारी अभियंता विवेकराज यांनी फिर्याद दिली आहे. बांधकाम विभाग, जलसंधारण विभाग आणि ग्रामीण पाणीपुरवठा या तिन्ही विभागातील कंत्राट मिळवण्यासाठी कोकाटे यांनी बनावट कागदपत्रे सादर केल्याचे उघड झाले आहे. सदर प्रकरणाने जिल्हा परिषद व शासकीय यंत्रणेत खळबळ माजली आहे. कोकाटे यांनी खोटी माहिती व बनावट दस्तऐवज सादर करून शासकीय निधीवर डोळा ठेवल्याचा आरोप करण्यात येत आहे.
धाराशिव जिल्ह्यात ठेकेदार-गुंड संबंधांवरून चर्चेला उधाण
दरम्यान, रमेश कोकाटे यांच्यावर आधीच अनेक गुन्हे दाखल आहेत. काही दिवसांपूर्वी निपाणी येथे झालेल्या कुस्ती स्पर्धेत झालेल्या गोंधळ प्रकरणातही निलेश घायवळ आणि रमेश कोकाटे यांच्यासह काही जणांवर गुन्हे दाखल झाले होते. या सर्व घडामोडींमुळे धाराशिव जिल्ह्यात ठेकेदार-गुंड संबंधांवरून चर्चेला उधाण आले आहे. पोलिस तपास सुरू असून, आणखी मोठे घोटाळे उघड होण्याची शक्यता व्यक्त केली जात आहे.
