धाराशिव : तुळजापूर पोलीस स्टेशन अंतर्गत दाखल करण्यात आलेल्या खंडणी प्रकरणात पत्रकार श्री. सुनील ढेपे यांना तुळजापूर न्यायालयाकडून जामीन मंजूर करण्यात आला आहे. सुनील ढेपे यांच्या वतीने जामीन अर्जावर ॲड. विशाल साखरे यांनी केलेला सखोल व प्रखर युक्तिवाद न्यायालयाने ग्राह्य धरला.
सदर प्रकरणात रिमांडच्या पहिल्या टप्प्यात पोलिसांनी १० दिवसांच्या पोलीस कोठडीची मागणी केली होती. मात्र ॲड. विशाल साखरे यांच्या युक्तिवादामुळे न्यायालयाने केवळ दोन दिवसांचीच पोलीस कोठडी मंजूर केली. त्यानंतर पुढील रिमांडवेळी पुन्हा १० दिवसांची कोठडी मागण्यात आली असता, ही मागणी अवास्तव असून त्यासाठी ठोस कारणे नसल्याचा युक्तिवाद ॲड. साखरे यांनी केला.
हा युक्तिवाद मान्य करत माननीय न्यायालयाने पोलिस प्रशासन व सरकारी वकिलांना अवास्तव कोठडी मागणीबाबत चांगलेच सुनावले. तसेच पोलीस कोठडीसाठी स्पष्ट व संयुक्तिक कारणे मांडणे आवश्यक असल्याचे नमूद करत न्यायालयाने केवळ एक दिवसांचीच पोलीस कोठडी मंजूर केली.
जामीन सुनावणीदरम्यान ॲड. विशाल साखरे यांनी खंडणी मागितल्याचा आरोप पूर्णतः निराधार असल्याचा ठोस युक्तिवाद मांडला. फिर्यादीच्या सांगण्यावरून तिसऱ्या व्यक्तीने दुसऱ्या व्यक्तीच्या खात्यात ५,००० रुपये भरल्याचा दावा खोटा असून, या व्यवहाराशी सुनील ढेपे यांचा कोणताही थेट आर्थिक संबंध नसल्याचे त्यांनी स्पष्ट केले.
तसेच माननीय सर्वोच्च न्यायालय व उच्च न्यायालयाच्या निकालांचे दाखले देत, राजकीय हेतूने तसेच ड्रग्स प्रकरणातील बातम्या प्रसिद्ध केल्यामुळे द्वेषातून सदर गुन्हा दाखल करण्यात आल्याचा युक्तिवाद करण्यात आला. हे सर्व मुद्दे ग्राह्य धरून माननीय न्यायालयाने सुनील ढेपे यांची जामीनावर मुक्तता करण्याचे आदेश दिले.
या प्रकरणात ॲड. विशाल साखरे यांना ॲड. मंजुषा साखरे, ॲड. विराज जगदाळे (विशेष सहकार्य), ॲड. महेश लोहार, ॲड. शुभम तांबे, ॲड. अर्चना कांबळे, ॲड. संकेत गोरे, ॲड. ओंकार कोरेगावकर, ॲड. अमित गोळे, ॲड. लक्ष्मीकांत कुलकर्णी तसेच रोहित लोमटे व महेश पवार यांनी सहकार्य केले.
पत्रकार सुनील ढेपे यांना तुळजापूर न्यायालयाकडून जामीन मंजूर, ॲड. विशाल साखरे यांचा जोरदार युक्तिवाद
