धाराशिव (प्रतिनिधी): नगरपरिषद निवडणुकांच्या पार्श्वभूमीवर शहरात उमेदवारी अर्ज दाखल करण्यास सुरुवात झाली आहे. प्रभाग क्रमांक ११ मधून श्रद्धा जीवन जाधव यांनी सर्वसाधारण (महिला) गटातून आपला उमेदवारी अर्ज दाखल करत निवडणूक रिंगणात उतरल्या आहेत.
आज दुपारी नगरपरिषद कार्यालयात समर्थकांच्या उपस्थितीत श्रद्धा जाधव यांनी अर्ज दाखल केला. अर्ज दाखल करताना त्यांच्यासोबत स्थानिक नागरिक, महिला बचतगटातील सदस्या, कार्यकर्ते आणि समाजातील मान्यवर उपस्थित होते. प्रभागातील अनेक समस्या, पाणीपुरवठा, स्वच्छता, रस्ते-बांधकाम तसेच महिलांच्या सुरक्षेच्या प्रश्नांसाठी काम करण्याचा संकल्प त्यांनी यावेळी व्यक्त केला.
श्रद्धा जाधव यांनी माध्यमांशी बोलताना सांगितले की,
“प्रभाग क्रमांक ११ चा सर्वांगीण विकास, महिलांसाठी अधिक सुविधा, युवकांना रोजगारसंधी आणि पायाभूत सुविधांच्या उभारणीसाठी मी कटिबद्ध आहे. नागरिकांनी दाखवलेल्या विश्वासाचे प्रतिफल कामातूनच देणार आहे,” असे त्या म्हणाल्या.
या उमेदवारीमुळे प्रभाग क्रमांक ११ मध्ये निवडणुकीची चुरस आणखी वाढण्याची शक्यता व्यक्त केली जात आहे. स्थानिक पातळीवरील महिला नेतृत्व बळकट होण्यास ही उमेदवारी महत्त्वपूर्ण ठरेल, अशी चर्चा नागरिकांमध्ये आहे.
