धाराशिव – जिल्ह्यात गेल्या काही दिवसांपासून झालेल्या मुसळधार पावसामुळे शेतकऱ्यांचे प्रचंड नुकसान झाले आहे. अनेक गावे पाण्याखाली गेली आहेत. शेतकऱ्यांची पिके वाहून गेली असून जनावरे दगावली आहेत. शेतकरी कुटुंब उघड्यावर पडले आहेत. सरकारी पंचनामे न झाल्याने शेतकरी हवालदिल झाले आहेत. या संकटात शेतकरी मदतीची आस लावून प्रशासनाकडे डोळे लावून बसले असताना जिल्ह्याचे प्रमुख अधिकारी असलेले जिल्हाधिकारी कीर्ती किरण पुजार आणि निवासी उपजिल्हाधिकारी शोभा जाधव हे “गार डोंगराची हवा न बायला सोसना गारवा” या गाण्यावर झिंगाट डान्स करताना पाहायला मिळत आहेत. तुळजापूर फेस्टिवलमध्ये हे अधिकारी डान्स करत असल्याचा व्हिडीओ समोर आला आहे. हा व्हिडीओ व्हायरल झाल्याने जिल्हाभरच नव्हे तर राज्यभर चर्चा रंगली आहे.
शेतकऱ्यांच्या अश्रूंना हात द्यायला हवे असताना जिल्हाधिकारी मात्र उत्सवाच्या जल्लोषात गुंग असल्याचा आरोप होत आहे. यामुळे प्रशासनाच्या भूमिकेवर मोठा प्रश्नचिन्ह उभा राहिला आहे. अनेक सामाजिक संघटनांनी व जनतेने जिल्हाधिकाऱ्यांच्या या वागण्यावर जोरदार टीका केली आहे. “एकीकडे शेतकरी आत्महत्येच्या उंबरठ्यावर, तर दुसरीकडे जिल्हाधिकारी नाचण्यात व्यस्त आहेत. हे प्रशासनाच्या असंवेदनशीलतेचे धक्कादायक चित्र आहे,” अशा शब्दांत संताप व्यक्त होत आहे. जिल्ह्यात मदतीची आणि पुनर्वसनाची तातडीची गरज असताना प्रशासनातील सर्वोच्च अधिकारी अशा प्रकारे वागत असल्याने शासनाची प्रतिमा मलिन झाल्याचे बोलले जात आहे.
तहसीलदारांच्या गाण्याचा व्हिडीओ व्हायरल; विभागीय आयुक्तांची कारवाई, निलंबनाचा धडाका!
शासकीय कार्यालयात निरोप समारंभाच्या कार्यक्रमात खुर्चीवर बसून गाणं म्हणणं एका तत्कालीन तहसीलदाराला चांगलंच महागात पडलं आहे. समाज माध्यमावर व्हिडीओ व्हायरल झाल्यानंतर जिल्हाधिकाऱ्यांनी दिलेल्या अहवालाच्या आधारे विभागीय आयुक्तांनी उमरीचे तत्कालीन तहसीलदार प्रशांत थोरात यांच्यावर निलंबनाची कारवाई केली आहे. या निर्णयामुळे जिल्हा प्रशासनात मोठी खळबळ उडाली होती.
प्रशांत थोरात हे उमरी तहसील कार्यालयात कार्यरत होते. ८ ऑगस्ट रोजी त्यांची लातूर जिल्ह्यातील रेणापूर येथे बदली झाली होती. त्यांच्या जागी मंजुषा भगत यांनी तहसीलदार म्हणून रुजू होऊन पदभार स्वीकारला.
दरम्यान, बदलीनंतरच्या निरोप समारंभात ८ ऑगस्ट रोजी उमरी तहसील कार्यालयातील अधिकारी आणि कर्मचाऱ्यांनी थोरात यांचा निरोप कार्यक्रम आयोजित केला होता. यावेळी थोरात यांनी कार्यालयातच खुर्चीवर बसून ‘तेरा जैसा यार कहा’ हे गाणं गायले. हा व्हिडीओ सोशल मीडियावर व्हायरल होताच प्रशासनाने गंभीर दखल घेतली.
शासकीय दायित्वाची जाणीव सोडून केलेल्या या कृतीमुळे अखेर विभागीय आयुक्तांनी त्यांच्यावर निलंबनाची कारवाई केली असून, या निर्णयावरून सरकारी अधिकाऱ्यांच्या जबाबदारीबाबत मोठी चर्चा सुरू झाली आहे.
