“पूरग्रस्तांच्या अश्रूंवर प्रचाराचा रंग – शिंदे-सरनाईक यांच्या मदतीचं किट वाद”, “मदतीच्या नावाखाली जाहिरातबाजी – पूरग्रस्तांचा संताप अनावर”

मराठवाड्यातील महाप्रलयामुळे (Marathwada Rain-Flood) शेकडो गावं उद्ध्वस्त झाली आहेत. हजारो नागरिक बेघर झालेत. संसार पाण्याखाली गेला. लोकांना मदतीसाठी सरकारकडून तातडीने हात पुढे होणं अपेक्षित होतं. मात्र मदत पोहोचवतानाही राजकीय रंग आणि वैयक्तिक प्रचार ठळकपणे डोळ्यात भरतोय.

उपमुख्यमंत्री एकनाथ शिंदे (Eknath Shinde) आणि शिवसेना शिंदे गटाचे मंत्री प्रताप सरनाईक (Pratap Sarnaik) यांच्याकडून मदतीचे किट्स वाटप सुरू आहे. पण या किट्सवर थेट शिंदे आणि सरनाईक यांचे मोठे फोटो छापण्यात आले आहेत. सरकारी मदतीचा ठसा बाजूला ठेवून, वैयक्तिक मदत आणि स्वतःच्या नावाचा ठसा उमटवण्याचा प्रयत्न होत असल्याचं चित्र आहे.

यामुळे धाराशिव जिल्ह्यातील पूरग्रस्त ग्रामस्थांत प्रचंड संताप उसळला आहे. काही गावकऱ्यांनी थेट आक्रमक होत, “गेल्या तीन दिवसांपासून कोणीही विचारपूस केली नाही. आम्हाला तुमचा फोटो असलेली मदत नको, तुमचा टेम्पो परत न्या!” असा संतप्त स्वर काढला.

तर काही गावकऱ्यांनी हतबल होत, “आमचा संसार पाण्याखाली गेला आहे. आम्हाला कोणत्याही स्वरूपात मदत मिळाली तरी ती घ्यायची आहे…” असं सांगत मदत स्वीकारली.