हॅलो धाराशिव ; धाराशिव शहरात भाजप कार्यकर्त्याची गुंडगिरी समोर आली आहे. भाजपच्या या गुंड कार्यकर्तामुळे धाराशिव शहरातील राजकारण आता अक्षरशः गुन्हेगारीच्या दलदलीत ओढले गेले आहे. नगर परिषद निवडणुकीच्या तोंडावर शहरातील वातावरण तापले असून माजी नगरसेवक रोहित निंबाळकर यांच्यावर शनिवारी रात्री जीवघेणा हल्ला करण्यात आला. हा हल्ला ठरवून, नियोजनबद्ध रित्या करण्यात आल्याचा गंभीर आरोप निंबाळकर यांनी केला आहे. दरम्यान, सदर हल्लेखोर हा भाजप आमदार राणाजगजीतसिंह पाटील यांचा निष्ठावंत कार्यकर्ता असल्याचं बोललं जात आहे.
मिळालेल्या माहितीनुसार, भाजप कार्यकर्ते विजय राठोड, त्याने एका दुकानात घुसून निंबाळकर यांच्यावर हल्ला चढवला. या घटनेनंतर दोन्ही गटात तुंबळ हाणामारी झाली आणि परिसरात एकच गोंधळ उडाला. घटनेचा सीसीटीव्ही फुटेज सध्या सोशल मीडियावर व्हायरल झाला असून, नागरिकांमध्ये तीव्र संतापाची लाट उसळली आहे. दरम्यान, स्थानिक राजकारणातील स्पर्धा, कुरघोडी आणि आरोप-प्रत्यारोप यांच्या पार्श्वभूमीवर हा हल्ला घडल्याचा अंदाज व्यक्त केला जात आहे. निंबाळकर यांनी हा हल्ला “ठरवून आखलेला कट” असल्याचा आरोप करत, “या षडयंत्रामागे नेमका सूत्रधार कोण आहे, याचा पोलिसांनी सखोल तपास करावा,” अशी मागणी होत आहे.
दरम्यान, धाराशिव शहरात गेल्या काही महिन्यांपासून गुन्हेगारी घटनांमध्ये वाढ होत असल्याचे चित्र दिसून येत आहे. दिवसेंदिवस राजकीय वैमनस्यातून हाणामाऱ्या, धमक्या आणि हल्ल्यांच्या घटना वाढत चालल्याने कायद्याचा धाक उरला आहे का? असा प्रश्न नागरिकांतून उपस्थित केला जात आहे. पोलिस प्रशासनाने या घटनेचा तात्काळ तपास करून दोषींवर कठोर कारवाई करावी, अन्यथा नागरिकांच्या सुरक्षेचा प्रश्न अधिकच गंभीर बनेल, अशी मागणी शहरातील नागरिक आणि सामाजिक संघटनांकडून केली जात आहे.
नेमकं काय म्हणाले रोहित निंबाळकर?
दरम्यान “हॅलो धाराशिव”शी बोलताना, रोहित निंबाळकर म्हणाले की, ” मी ज्या दुकानात बसलो होतो त्या ठिकाणी विजय राठोड आला. त्याने दुकान मालकाशी वाद घालायला सुरुवात केली. मला वाटलं की, हा दुकान मालक आणि राठोड याचा वैयक्तिक वाद असेल. मात्र, त्याने माझ्यावर देखील हल्ला करत मला मारहाण सुरू केली.” माझ्यावर झालेला हल्ला हा कट असून, मी सदर घटने विरोधात पोलिसांकडे तक्रार देणार असल्याची माहिती रोहित निंबाळकर यांनी दिली”.
विजय राठोड यांच्यावर अनेक गुन्हे दाखल असल्याची माहिती देखील समोर येत आहे.
