माजी नगरसेवक रोहित निंबाळकर यांच्यावर झालेला हल्ला प्रकरणी आनंदनगर पोलीस ठाण्यात गुन्हा दाखल करण्यात आला आहे. रोहित निंबाळकर यांनी आनंद नगर पोलीस ठाण्यात दिलेल्या तक्रारीवरून विविध कलमान्वये गुन्हा दाखल करण्यात आला आहे. माजी नगरसेवक रोहित निंबाळकर यांच्यावर विजय राठोड या भाजपच्या कार्यकर्त्याने प्राणघातक हल्ला केला होता. या हल्ल्यात रोहित निंबाळकर यांच्या हाताला गंभीर दुखापत झाली आहे. निंबाळकर यांच्यावर 30 ऑक्टोबर रोजी रात्री नऊ वाजता एका दुकानात राठोड नावाच्या कार्यकर्त्याने अचानकपणे हल्ला चढवला होता. सदर, हल्ल्याप्रकरणी रोहित निंबाळकर यांनी दिलेला फिर्यादीवरून विजय खेमा राठोड आणि आकाश मधुकरराव तावडे यांच्यावर गुन्हा दाखल करण्यात आला आहे. कलम 118 (1), 115 (2), 54, 352, 351(2), 351(3), 3 (5), 324(4) या कलमानुसार गुन्हा दाखल करण्यात आला आहे.
भाजप कार्यकर्ते विजय राठोड, त्याने एका दुकानात घुसून निंबाळकर यांच्यावर हल्ला चढवला. या घटनेनंतर दोन्ही गटात तुंबळ हाणामारी झाली आणि परिसरात एकच गोंधळ उडाला. घटनेचा सीसीटीव्ही फुटेज सध्या सोशल मीडियावर व्हायरल झाला असून, नागरिकांमध्ये तीव्र संतापाची लाट उसळली आहे. दरम्यान, स्थानिक राजकारणातील स्पर्धा, कुरघोडी आणि आरोप-प्रत्यारोप यांच्या पार्श्वभूमीवर हा हल्ला घडल्याचा अंदाज व्यक्त केला जात आहे. निंबाळकर यांनी हा हल्ला “ठरवून आखलेला कट” असल्याचा आरोप करत, “या षडयंत्रामागे नेमका सूत्रधार कोण आहे, याचा पोलिसांनी सखोल तपास करावा,” अशी मागणी होत आहे.
दरम्यान, धाराशिव शहरात गेल्या काही महिन्यांपासून गुन्हेगारी घटनांमध्ये वाढ होत असल्याचे चित्र दिसून येत आहे. दिवसेंदिवस राजकीय वैमनस्यातून हाणामाऱ्या, धमक्या आणि हल्ल्यांच्या घटना वाढत चालल्याने कायद्याचा धाक उरला आहे का? असा प्रश्न नागरिकांतून उपस्थित केला जात आहे. पोलिस प्रशासनाने या घटनेचा तात्काळ तपास करून दोषींवर कठोर कारवाई करावी, अन्यथा नागरिकांच्या सुरक्षेचा प्रश्न अधिकच गंभीर बनेल, अशी मागणी शहरातील नागरिक आणि सामाजिक संघटनांकडून केली जात आहे.
नेमकं काय म्हणाले रोहित निंबाळकर?
दरम्यान “हॅलो धाराशिव”शी बोलताना, रोहित निंबाळकर म्हणाले की, ” मी ज्या दुकानात बसलो होतो त्या ठिकाणी विजय राठोड आला. त्याने दुकान मालकाशी वाद घालायला सुरुवात केली. मला वाटलं की, हा दुकान मालक आणि राठोड याचा वैयक्तिक वाद असेल. मात्र, त्याने माझ्यावर देखील हल्ला करत मला मारहाण सुरू केली.” माझ्यावर झालेला हल्ला हा कट आहे असं रोहित निंबाळकर म्हणाले.
विजय राठोड यांच्यावर अनेक गुन्हे दाखल असल्याची माहिती देखील समोर येत आहे.
